Una bìsita virtuale intra de sos iscusòrgios de su campusantu monumentale de Tàtari, siat pro nd’apretziare su valore siat pro nde connòschere s’istòria. Unu vìdeu chi avalorat una richesa architetònica e culturale, chi medas oe in die non connoschent. Est su progetu interativu fatu, cun passione manna, contivìgiu e cumpetèntzia, dae sas dischentes e sos dischentes de sa III F de s’Iscola segundària de primu gradu de s’Istitutu cumprensivu Tola de Tàtari, ghiados dae sas insegnantes Irene Addis e Antonella Deiana. Unu traballu ispantosu de tale manera chi su sìndigu de Tàtari Campus at chertu retzire in sas dies passadas a sos autores, pro lis fàghere sos cumprimentos mannos.

Intra de sos meses de martzu e de abrile sas duas professoras ant ghiadu a sos istudiantes in una faina didàtica in contu de su campusantu monumentale. B’at leadu parte fintzas unu pitzocheddu de sa classe III H. Su traballu, fatu impreende sa tècnica de sa realidade ismanniada, permitit de bisitare su campusantu monumentale e de apretziare sas isculturas bellas de s’artista Giuseppe Sartorio. Bastat a s’allistare in una pàgina Internet (su ligòngiu s’agatat in s’indiritzu www.comune.sassari.it) pro pòdere fàghere sa bìsita virtuale e bìere totu sos aprofundimentos, cun immàgines fotogràficas, boghe chi contat e vìdeos.

Su sìndigu Nanni Campus at fatu sos cumprimentos pro su traballu, contivigiadu a fine, e in s’addòbiu chi s’est fatu in su Palàtziu Ducale at cunsignadu a totus un’atestadu de gràtzias a nùmene suo, de s’Amministratzione comunale e de totu sa tzitade.

a.i.g.

Attività realizzata col contributo della Regione Sardegna – IMPRENTAS 2020-2021. LR 22/2018, art22